Pengawa BA di Kuching...

Hari enam tu tadi BA & Rin bisi nemuai baru ke Kuching. Sekali tu kami enda angkat kelalu tumu. Kami tiga Indai Antok angkat ari Betong jam 7.30 pagi.

Tengahari nya kami bisi appointment di Matang. Sebedau kia kami tiga makai tengahari di SCR Rubber Road...wah udah baru lah interior design ia...best. Tang urang maioh...kami tiga duduk ba luar.

Nengah jalai Matang tengahari nya chukup lubah laban raban mensia ti nganjung diri ngabas e-mart Lee Ling, Kuching ka baru dibuka. Urang ti kia sampai parking ba tisi roundabout.

e mart

Tang dipeda BA e-mart Tudan, Miri jauh lebih besai ari ka ditu. Alai parking di Tudan pan maioh agi...laban sida mega carter ka temuai ari manoa Brunei ka bebeli barang di Miri.

Kami tiga pulai ke rumah nyau jam 7.30 malam...nadai jam ka ngabas e-mart. Beguai pulai laban ka meda AF7...ia ka sekali tu kami duai Rin nadai bejalai bukai. Pulai ke rumah, tambah mega Ally udah datai lemai tu ari UM.

Hari minggu nya baru kami empat enggau Ally bisi nurun baru ke e-mart, Lee Ling dia. Bendar ga ngiga alai parking. Mensia chukup maioh...urang shopping ditu laban rega barang bisi ka murah.

Rin bisi register udah nyadi member awak ka ulih bebeli barang ngena rega member. Indai Antok diasoh BA ngiga barang ti ka dibai ia pulai...dahnya BA mayar ia.

Ia meli empat bungkus gula 1kg. Pechaya kita ..rega ia RM0.99 sekilo tang siko member ulih meli dua kilo aja. Enti meli lebih ari nya rega ia RM1.50 baka nya....murah ga nya.

Bisi urang madah maia hari launching sari nya sekilo gula dia RM0.50...MURAH NYE!!!

Tembu bejalai dia kami empat ke tHe Spring laban bank alai kami duai Rin bebayar samoa dia. Kami empat makai di Food Bazaar dia. Kami duai Ally makai mee tomato...nyammm nyammm amat..lama BA nadai makai mee tomato.

tHe Spring

Maia BA ngodar ia...lucu..BA ngodar ai lychee tang digaga amoi nya ai tea c...bengal ke?? lychee & tea c enda sebaka chara nyebut tang nyau ka sebaka bunyi ia...Rin madah ka BA nyebut utai mit nyawa dibuka..nya alai amoi nya enda ninga...salah BA kah??? sorryy...

Sebedau pulai kami empat singgah di Parkson laban ka bebeli ka baju awak dibai Indai Antok pulai ka uchu ia.

Kami tiga mulai ka diri ke Betong jam 3.00 lemai...nya pan mummy & indai Antok agi rindu berandau...pulai kitai enggai ka laun..ko BA madah ka ia.

Kami tiga datai di Betong jam 9.30 malam...beguai BA tama ke rumah meda AF Diari...bisi kah??

Reward Yourself
Astana Pengerindu Astana Kitai