Mupok ke Kuching hari enam datai hari minggu!!!

Dinihari 10hb hari ujan lebat amat di Betong start ari jam 2 pagi. Rin dani laun ga taja ia gawa sari nya. BA pan tumu ga dani laban ti nuchi gare kami duai dalam injin gare. Irau meda hari enda ngetu ujan..jembi aja lah gare nya.

Cigu Bio digerak BA tumu dani awak ulih ngambi BA ba workshop Lai. Moto BA ditinggal dia laban ti ka ngadu ka brake belakang ia. Kami duai ngirup ba kedai sepiak Everise.

Sida Boji pan udah mupok ke Mukah pagi tu jam 7 pagi laban ti nganjong Wedy nyambung belajar ba POLIMU.

Pulai kami duai Cigu Bio makai tengahari jam 2 lemai ba Qui Garden..BA pulai ke rumah..nyau ke puas meda tv alu tetindok ba ruang tamu. Jam 5.30 lemai BA dani maia Rin ngerak.

Rin nanya BA nyadi ke enda mupok ke Kuching...BA madah nyadi. Kami tiga Cigu Bio angkat ari Betong jam 7.30 lemai. Datai di Simpang Sri Aman jam 8.20 lemai..kami tiga bebela makai dia...ujan agi lebat.

Jam 8.45 lemai kami mupok ari Simpang Sri Aman. Ujan majak lebat. Moto ari jalai nuju ke Kuching maioh amat tang ia ka ari Kuching nadai entu. Alit ga ati BA.

Bisi ga maia moto kami tiga ngelantak lupak ai ka besai..nyau baka anak sungai jalai raya. Nyau enda jauh ari Simpang Gedong...enda mukai-mukai dua buah moto ba moa kami nempuh ai..besai ga nyau baka sungai.

BA pan irau..kati neh...tengah aja. Nasib injin moto enda padam...lebih 500 meter pemanjai jalai nya ampuh bah.

Kira-kira jam 10.45 malam moto kami datai cun ba Simpang Gedung...meda moto maioh amat besusun dia..bisi orang ka pansut ari kereta ga ..BA irau lalu nanya urang dia...sida madah jalai niki bukit ba Serian nya enda ulih tengah.

Enda puas ati BA..pajak ka BA meh niki bukit nya meda bas enggau dua buah kereta bukai tunda udi..bepansa enggau sida lori besai..diturun ka BA chermin kereta lalu betanya enggau dirver nya..ia madah jalai putus..tanah lunsor...enda ulih tengah. Kami nikal ke Simpang Gedung.

Irau ati kami tiga...bah bakani runding kitai deh? BA ka mai nikal ke Betong aja...tang Cigu Bio madah ka bahaya amat nengah bah atas jalai nya...takut ga asai ati.

Kami tiga ngurung diri dalam moto ba Simpang Gedung begulai enggau urang bukai ka bisi dia. BA ngasoh Rin saduai Cigu Bio tindok...taja mata BA ngantok tang irau ga ka nindok ka diri.

Kira-kira jam 12 tengah malam BA telipon ka lumor Indai Mau..laban ia diatu udah gawa ba Pejabat Daerah Serian.

Kasih ia udah gali...BA nanya ka gaia jalai kilah ka Serian...ia pan enda entu pasti ga...nya ia lalu nelipon ke Bilik Gerakan Banjir sida ia di Serian. Ia meri BA lumor telipon sida ia. Indai Mau pan irau ga.

Jam 2 pagi, BA telipon ke Bilik Gerakan Banjir nanya ka gaia penyadi datas bukit din, officer nya madah ka alam setengah jam jalai atas bukit udah tau ditengah.

Kami tiga lalu mupok ngena kereta ke jalai ba mua Kem Semuja..kereta udah maioh ga betusun dia. BA meda kereta polis datai ari kilah Serian..ba ati BA..oohh udah ulih tengah jalai tu.

Kereta peronda Polis nya ngetu enda jauh ari kereta kami...BA pansut ari kereta bepayung bejalai nuju sida...Polis nya nurun ka chermin moto..mangah ga ia nanya BA..nama hal...BA faham laban maia tu jam enggau penusah gaia tu semua urang stress.

BA madah ka sida jalai lepas Simpang Gedung udah bah..tinggi enda ulih ditengah kereta mit.

Udahnya, BA tama agai kereta terus mupok ke Serian. Ba atas bukit tanah ti kuning ka dipeda. Jalai lichin. Ba kilah Ranchan...laman rumah urang maioh udah tenggelam laban ai.

Udahnya kami terus mupok ke Kuching...Jam 4 pagi kami datai di rumah...mata udah ngantok...lelak. BA nadai berambi ka gambar malam nya laban ti kelalu takut sereta irau.

Nesal ga asai ati tang bakani lah..udah ga datai di Kuching.

Astana Pengerindu Astana Kitai